Ukraina Yuqarı Radası reisiniñ birinci muavini İrına Geraşçenko deputatlarnı Kremlniñ cenk esirleri ve siyasiy mabüsleriniñ statusını qanun seviyesinde belgilemege çağıra.
Bu aqta o, fevralniñ 4-nde Yuqarı Radanıñ Uzlaştıruv keñeşinde bildirdi, dep haber ete «Ukrinform» ukraina haber agentligi.
«Kremlniñ cenk esirleri, siyasiy mabüsleri ve reineleriniñ statusını belgilegen qanun leyhalarınıñ kün tertibine kirsetilüvini talap etem. Bir sıra qanun leyhamız bar ve, bilgenime köre, Milliy havfsızlıq ve mudafaa komiteti olarnı baqıp çıqtı», – dedi Geraşçenko.
Onıñ qayd etkenine köre, Ukraina parlamenti Avropa Şurası Parlament Assambleyasınıñ rezolütsiyasına köre bu qanun leyhalarına rey bermeli.
Geraşçenko «cenk esiri ukrainalı deñizcilerniñ cenk areketleriniñ iştirakçileri olaraq tanıluvı müim ve veteranlarnıñ yekâne cedveli tizilmeli», dep qayd etti.
«Bu afta veteranlarnıñ statusınen bağlı 9478 qanun leyhasını birinci oquvda baqmağa rica etem, cenk esirlerimizniñ tuvğanları ve dostlarınıñ ricasınen 24 deñizcige cenk areketleriniñ iştirakçisi statusını bermege imkân beredejk. Kimseniñ şübhesi yoq ki, rusiyeliler ateş açqanda bu insanlar birinci sırada edi. 9508 qanun leyhasını da birinci oquvda baqmağa rica etem – veteranlarnıñ yekâne cedveli. Bu da yaqında qurulğan Veteranlarnıñ işleri nazirliginiñ ricasıdır», – dedi Geraşçenko.
Al-azırda 80-den ziyade Ukraina vatandaşı siyasiy baqışları sebebinden Rusiye apishanelerinde tutula, dep bildirdi yanvarniñ 12-nde Ukraina Yuqarı Radasınıñ insan aqları vekâletlisi Lüdmila Denisova.
Ukraina Tış işler nazirliginiñ malümatına köre, 2018 senesi iyün ayına qadar, eñ az yigirmi dört Ukraina vatandaşı Rusiye apishanelerinde ve 40 siyasiy mabüs işğal etilgen Qırımda siyasiy sebeplerden tutulğan edi.
