Ukraina tarafı Minskteki Üç taraflı bağ gruppasınıñ muzakereleri vaqtında üç ukrainalı esirni Donbastaki cinayetler içün mahküm etilgen üç rusiyelige deñiştirmege teklif etti, dep bildirdi Yuqarı Radanıñ spiker muavini, Üç taraflı bağ gruppasınıñ gumanitar ast gruppasınıñ Ukraina vekili İrina Geraşçenko Facebookta.
Onıñ aytqanına köre, Ukraina «Debaltsevo faciasından berli» terroristler tutqan ukrainalı askerler Sergey Glondar, Bogdan Patüşenko ve Aleksandr Korinkovnı azat etmege talap ete.
Geraşçenkonıñ bildirgenine köre, Ukraina akimiyetiniñ teklifine berilgen cevap – «sıfır».
Berilgen malümatqa köre, Ukraina tarafınıñ bazı esirler «işğal altındaki topraqlarnıñ apishanelerinde qıynalıp öldürilgenini» «tahmin etmek içün belli sebepleri bar».
«Bizler OSCEge 13 vatandaş aqqında malümat berdik, olarnı Donetsk ve Lugansk vilâyetleriniñ ayrı rayonları bu yıllar içinde almaştırılacaqlar cedvellerine kirsetken edi, lâkin belli olmağan sebeplerden olarnıñ soyadları tasdıqlanğan ve tutulğanlar cedvelinden ğayıp oldı. Bu insanlarnıñ taqdiri aqqında tolu malümat berilmesini talap etemiz. Daa 70-ten ziyade ukrainalı aqqında da malümat berilmesi talap etemiz», – dep yazdı Geraşçenko.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete. BM malümatına köre, zıddiyet vaqtında 10 300 insan elâk oldı.
2015 senesiniñ başında Debaltsevo ve oña yaqın topraqlar Ukraina askerleriniñ kontroli altında edi. Üç taraftan onı gibrid Rusiye-separatist quvetleri sarıp aldı, ve arbiy komandanlıq Ukraina Silâlı quvetleriniñ bölüklerini çıqarmağa qarar aldı.
Resmiy malümatqa köre, Debaltsevodan çıqqanda 179 asker elâk oldı, onlarnen yaralı ve ğayıp olğanlar bar edi.
Minsk añlaşmalarına köre, Debaltsevo ve etraftaki topraqnı Ukraina akimiyeti kontrol etmeli.
