Qırımtatar resurs merkezi (QRM) Qırımtatar halqı genotsidiniñ qurbanlarını añma kününe bağışlanğan «içtimaiy ağlarda furtuna» başladı, dep ilân etti.
«Ukrayına ve halqara cemaatçılığına insanlıqqa qarşı deşetli bir cinayet, qırımtatar halqınıñ 1944 senesiniñ genotsidi aqqında hatırlatmağa isteymiz. Umumen Qırımdan 238500 kişi sürgün etildi, ilk yılları sürgün etilgenlerniñ 46,2%-ı vefat etti», – dep haber ete Qırımtatar resurs merkeziniñ matbuat hızmeti.
Qırımtatar resurs merkezi lâqayt olmağanlarnı «furtunağa» qoşulıp, teklif etilgen yazuvlı şiarlardan birini içtimaiy ağlarda tarqatmağa çağırdı.
Yazuvlı şiarlarnı #LIBERATECRIMEA Qırımnı işğalden azat etüv ve qırımtatar halqı ile birdemlik halqara faalleri tarafından azırlandı ve ukrayınalı ressam Andriy Yermolenko tarafından yapıldı.
Mayısnıñ 18-nde qırımtatarlarnıñ sovetler rejimi tarafından Qırımdan sürgün etilüviniñ 79 yılı tola.
Ukrayına Yuqarı Radasınıñ qararına köre, mayısnıñ 18-i Qırımtatar halqı genotsidiniñ qurbanlarını añma künü dep ilân etildi.
Adet üzre mayısnıñ 18-nde Ukrayınada qırımtatar halqınıñ Qırımdan sürgün etilüviniñ qurbanlarını añma tedbirleri keçirile, lâkin keçken sene Rusiyeniñ Ukrayınağa qarşı tam silâlı istilâsı kütleviy tedbirlerge tesir etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
