Kyivde Mıhaylivskıy Zolotoverhovıy Baş kilsesinde qırımlı, vatandaş faali, Kremlniñ eski siyasiy mabüsi Gennadiy Afanasyev ile vedalaşuv merasimi keçirildi. O, Ukrayınanı qorup, cebeje can berdi.
Soy-sop, dost ve yaqınlarından ğayrı Afanasyevniñ uruş ortaqları ve qırımtatar halqınıñ ve Ukrayına akimiyetiniñ vekilleri onı soñki yolğa ozğarmağa keldi. Vedalaşuv merasiminde Ukrayına prezidentiniñ Qırım Muhtar Cumhuriyetindeki daimiy vekili ve Ukrayına Tış işler naziriniñ birinci muavini Emine Ceppar bar edi.
Gennadiy Afanasyev Kyiv vilâyetiniñ Buça rayonındaki Vışneve şeerinde defin etilecek.
Aqmescitli fotoressam ve uquqçı Gennadiy Afanasyevniñ adı «qırımlı terroristler» davasınıñ mabüsi olğan soñ meşur oldı. 2014 senesi o, Qırımnıñ Rusiye işğaline qarşı çıqtı, soñra Aqmescitte FSB hadimleri tarafından tutuldı. Onı terakt azırlağanında qabaatladılar. Halqara aq qorçalayıcı teşkilâtlar davanı siyasiy, mabüslerini ise siyasiy mabüs dep adlandırğan edi.
Azat edilgen soñ Gennadiy Afanasyev 2016-2018 seneleri Qırım.Aqiqat müellifi edi.
Gennadiy Afanasyev Ukrayınanı qoluna silâ alıp qorudı, Rusiyeniñ Ukrayınağa qarşı büyük istilâsı başlağan ilk künlerde arbor komissarlıqqa bardı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
