Qırımlı, vatandaş faali, eski siyasiy mabüs Gennadiy Afanasyevniñ cebede elâk olğanı aqqında haberler peyda oldı. Afanasyevniñ Ukrayınanı qorup can bergeni dekabrniñ 21-nde belli oldı, bu malümatnı ömür arqadaşı Lüdmila Afanasyeva da Qırım.Aqiqatqa tasdıqladı.
«Ne yazıq ki, doğru», – dep ayttı Qırım.Aqiqatqa Lüdmila Afanasyeva.
Qırımtatar Milliy Meclisiniñ reis muavini, Ukrayına halq deputatı Ahtem Çiygoznıñ Qırım.Aqiqatqa bildirgenine köre, Gennadiy Afanasyev 241-inci brigadanıñ territorial mudafaasınıñ 130-ıncı batalyonında cenkleşti.
«Afanasyev Gennadiy Sergeyeviç, çağıruv adı «Tor». Lugansk vilâyetinde Biloğorivka civarında elâk oldı», – dep bildirdi Çiygoz Qırım.Aqiqatqa.
Qırımlınıñ anası Olga Afanasyeva Facebookta oğlunıñ ölüminen bağlı bir haber almadı, dep yazdı.
Gennadiy Afanasyevniñ ölümi aqqında Ukrayına Yuqarı Radasınıñ deputatı Oleksiy Ğonçarenko Telegram kanalında bildirdi: «Cebede Kremlniñ eski esiri Gennadiy Afanasyev elâk oldı, dep haber etildi. 2014 senesi işğalciler onı Qırımda tuttı, mahküm etti, işkencege oğrattı. Gennadiy 2016 senesi deñiştirildi. O, Kyiv territorial mudafaasına Ukrayınanı imaye etmege ketti. Şimdi azatlığımız içün canını feda etti».
Qırım.Aqiqat malümat ala.
Gennadiy Afanasyev Ukrayınağa qarşı büyük Rusiye arbiy istilâsınıñ ilk kününde arbiy komissarlıqqa ketti, qoluna silâ alıp, Ukrayınanı qorudı.
Aqmescitli fotoressam ve uquqçı Gennadiy Afanasyevniñ adı «qırımlı terroristler» davasınıñ mabüsi olğan soñ meşur oldı. 2014 senesi o, Qırımnıñ Rusiye işğaline qarşı çıqtı, soñra Aqmescitte FSB hadimleri tarafından tutuldı. Onı terakt azırlağanında qabaatladılar. Halqara aq qorçalayıcı teşkilâtlar davanı siyasiy, mabüslerini ise siyasiy mabüs dep adlandırğan edi.
