Bıltır iyun ayında Rusiye arbiyleri tarafından hırsızlanğan işğal etilgen Geniçesk sakini Dmıtro Zaharov Aqmescitniñ yañı SİZOsında tutula. Bu aqta «Qırım aq qorçalayıcı gruppası» haber ete.
Zaharovğa qarşı «mahsus arbiy operatsiyağa (Rusiye Federatsiyası Ukrayınadaki cenkni böyle adlandıra – QA) tirengeni içün teşkerüv yapıla».
Aq qorçalayıcılarnıñ qayd etkenine köre, keçken sene iyün ayında Dmıtro Zaharov Rusiye arbiyleri tarafından Geniçeskte bir tükân yanında tutuldı.
2022 senesi iyünniñ 24-nde Rusiye mediasında Hersondaki Rusiye FSB idaresi Ukrayına telükesizlik hızmetiniñ emrinen Rusiye arbiylerine mesac yollağan erkekni yaqaladı, dep haber etildi.
Aq qorçalayıcılarnıñ malümatına köre, Zaharovnıñ ömür arqadaşı yapqan muracaatına Qırımdaki Rusiye FSB idaresi Dmıtro Zaharovnıñ «mahsus arbiy operatsiya vaqtında Rusiye Federatsiyasınıñ telükesizligine zarar ketirgeninen bağlı» teşkerüv yapıldı. Şahıs ayatı ve sağlığı içün telüke olmağan şaraitlerde buluna, dep cevap berildi.
2022 senesi oktâbrniñ soñunda Ukrayına aq qorçalayıcıları Aqmescitte yañı SİZO açıldı, dep bildirdi. Rusiye akimiyeti bunı resmiy şekilde aydınlatmadı.
ZMINA insan aqları merkezi Qırımdaki menbalarına esaslanıp, rusiyeliler işğal etilgen topraqlardan işğal altındaki Qırımğa qanunsız çıqarğan ukrayınalılar Aqmescit SİZOsında ayrı binalarda tutula, dep bildire. Olar işkencege oğratıla, advokatlar kirsetilmey.
Hatırlatamız, Rusiye Federatsiyası işğal etken Ukrayına topraqlarından hırsızlanğan ukrayınalılarğa qarşı işkence aqqında qırımtatar faali ve siyasetçi Nariman Celâl tarif etken edi.
Rusiye Federatsiyasınıñ mahkemesi tarafından «Noman Çelebicihan batalyonında» iştirak etkeninde qabaatlanıp, sert rejimli koloniyada beş yıl qalmasına üküm etilgen Herson vilâyetiniñ 31 yaşında sakini Ruslan Abdurahmanov da Rusiye uquq qoruyıcıları tarafından işkencege oğratılğanını bildirdi.
«Agentstvo» Rusiye neşiri, Aqmescit SİZOsında işğal etilgen Ukrayına topraqlarında Rusiye ordusı ya da mahsus hızmetleri tarafından zapt etilgen 50-den 100-ge qadar ukrayınalı tutula, dep bildirgen edi.
Rusiye akimiyeti ve mahkemesi işğal etilgen topraqlarda ukrayınalılar tutulğanını tasdıqlay, lâkin sayısını aydınlatmay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
