Rusiye işğal etken Geniçeskte suv basqan Herson vilâyetiniñ sol tarafındaki rayonlardan insanlar kele, yerli sakinler ise içekler infektsiyaları artqanını qayd ete, dep bildirdi Geniçesk şeer şurasınıñ deputatı Yulian Luçko Azatlıq Radiosınıñ leyhası «Novını Prıazovya» leyhasına.
«Arta, kelgen bazı malümatlarğa köre, işğalci akimiyet aşı yapmağa tırışa. Amma kimse nasıl bir aşı olğanını añlamay. Bu aşı uyğun olmağan şaraitlerde saqlandı ve ketirildi, dep qorqamız. Amma statistika, içekler infektsiyalarına dair malümat, hususan holera aqqında işğalci akimiyet bildirmey, kimse bunı aytmay», – dedi o.
Ukrayına Silâlı quvetleriniñ Baş ştabı iyülniñ 5-nde bildirgenine köre, Herson vilâyetiniñ işğal altındaki Skadovsk ve Geniçeskte infektsiyalar arttı.
«Hastalıq alâmetlerine köre holerağa oşay. İşğalci akimiyet hastalar artqanını qabul etmeyip, regiondaki sanitar-epidemiologik vaziyet fenalaşqanını gizlemege tırışa, lafta memuriyet ve yaqın çevreniñ vekillerine holera aşısı gizliden yapıla», – dep aytıla haberde.
Bu malümatnı Herson vilâyetiniñ bir qısmı işğal altında olğanı içün ve uruşlar devam etkeni içün mustaqil menbalarda teşkermek imkânsız ola.
İyünniñ 6-nda saba Rusiye Herson vilâyetindeki Kahovka gidroelektrostantsiyasınıñ dambasını yoq etti, dep bildirdi Ukrayına arbiyleri. The New York Times neşiri ekspertlerniñ malümatına esaslanıp, gidroelektrostantsiyanıñ yoq etilüvi içinden patlatılmasınen bağlı, dep bildirdi. Tışarıdan ateş açılsa, aqibetleri böyle olmaz edi.
Birleşken Milletler bildirgenine köre, Rusiye oña Herson vilâyetiniñ işğal etilgen rayonlarına kirmege izin bermedi.
Ekspertler damba, büyük ihtimalnen, Rusiye ordusı kontrol etken gidroelektrostantsiyada qoyulğan patlayıcı maddeler sebebinden yok etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
