Geniçeskte Rusiyeni Qırımda tutılğan faal Edem Bekirovnı azat etmesine çağırdılar. Geniçesk rayon devlet memuriyeti yolbaşçısınıñ muavini Aleksey Sışçenko Bekirovğa qoltutmaq içün içtimaiy ağlarda fleşmob başlattı.
«Edemni azat etmek içün bedeniy yardım etip olamayım. Oña ve işdeşim Gülnara Bekirovağa (tutılğan Edem Bekirovnıñ ömür arqadaşı – QA) maneviy destek köstermege istedim. Onı unutmağanını köstermege istedim. Bu problemni ne qadar çoq insan bilse, buña ne qadar çoq diqqat etilse, Rusiye Federatsiyasına basqı arttırılır, belki», – dedi Sışçenko Qırım.Aqiqatqa.
Herson vilâyetindeki Novoalekseyevka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutuldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
Bekirovnıñ advokatı Aleksey Ladinniñ malümatına köre, şeker hastası olğan qırımtatar faaline apiske alınğan künü – dekabrniñ 13-nden berli – tibbiy yardım kösterilmey.
Dekabrniñ 18-nde Bekirovnıñ qızı Eleonora bildirdi ki, babasına alâ daa ilâc berilmedi. Rusiyeniñ Cezalarnı yerine ketirüv federal hızmeti Bekirovğa tibbiy yardım kösterilmegenini izaatlamay.
