Qırımnıñ büyük banklarından birisi “Genbank”, Visa ve MasterCard kartalarına hızmet etmekni toqtattı. Bunıñ aqqında müessiseniñ matbuat hızmeti haber etti.
“Visa Int. ve MasterCard halqara tölev sistemalarından emissiya etilgen AB “Genbank” bank kartalarınıñ deñiştirüv müddeti bitkeninden sebep, 2014 senesi avgustnıñ 14-ünden başlap, deñiştirilmegen kartalarınıñ hızmet etilmesi toqatatılacağını sizge haber etemiz”, - aytıla beyanatta.
Haber etilgeni kibi, avgustnıñ 14-ünece “Genbank” müşterilerine rusiye tölev sistemasınıñ “Mir” kartasını almağa teklif etile edi.
Bankta, “Mir” kartasına deñiştirüv bedava yapılğanı bildirile.
Moskovalı “Genbank” Qırımda işğalden soñ çalışıp başladı. Bugünge o Qırımda büyükligine köre ekinci (RNKB-den soñ) maliyeviy müessise. Şimdiki vaqıtta onıñ Aqyar (Sevastopol), Aqmescit (Simferopol), Yalta, Keriç ve başqa şeerlerde 90-dan ziyade bölügi bar.
Halqara tölev sistemalarınıñ dünyada eñ büyüklerden ekisi - Visa ve MasterCard, Qırımda çalışqan rusiye banklarınen işbirlikni toqtattı. “Genbank”, işğalden soñ Qırımda Visa ve MasterCard kartalarını çıqarğan yekâne bank edi.
2014 senesi Qırımda 31 rusiye bankı çalıştı. O vaqıttan olarnıñ sayısı ep azlaşa. 2014 senesi Rusiye Merkeziy bank tarafından Qırımda açılğan bir qaç banknıñ litsenziyaları keri çağırtıldı. 2015 senesi yazda Qırımda teşkilâtlarnıñ sayısı 20-gece tüşti. 2016 senesi baarde 16 bank bar edi (2 yerli maliyeviy müessisenen beraber). Şimdiki vaqıtta 10-ğa qadar qaldı.
Qırım işğalinden evel, yarımadada 70-den ziyade ukrain bankı çalıştı, olarnıñ arasında tek Ukrainanıñ maliyeviy müessiseleri degil de, çetel sermiyası olğan teşkilâtlar da bar edi.
