Arbiylerniñ malümatına köre, ava mudafaa küçleri eki raketa ve Rusiye dronlarınıñ ekseriyetini urıp tüşürdi.
«Yanvarniñ 25-ne keçer gecesi duşman Qara deñizdeki ava boşluğından eki H-59/69 aviatsiya raketasınen ücüm etti», – dep aytıla haberde.
Ava quvetleriniñ malümatına köre, «işğalciler 61 darbe Shahedini ve Örel, Kursk, Brânsk, Millerovo, Primorsko-Ahtarsk yönelişlerinden farqlı uçucısızlarnı qullandı».
Rusiyeniñ ava ücümini zenit raketa ordusı, radio-elektron küreş bölükleri, Ukrayina Ava quvetleri ve Mudafaa quvetleriniñ mobil ateş gruppaları keri qaytardı.
«Saat 09:30-da eki H-59/69 idare etilgen aviatsiya raketası ve 46 Shahed darbe uçucısızı ve diger uçucısızlarnıñ urıp tüşürilgeni tasdıqlandı», – dep qayd ete Ukrayina Ava quvetleri.
Bundan ğayrı, Ukrayina Silâlı quvetleriniñ malümatına köre, «15 duşman uçucısızı coyuldı».
«Ava mudafaası Odesa, Harkiv, Poltava, Sumı, Kyiv, Çerkası, Donetsk, Zaporijjâ, Dnipropetrovsk, Hmelnıtskıy ve Kirovoğrad vilâyetlerinde çalıştı», – dep bildirdi Ukrayina Ava quvetleri.
Daa evel, yanvarniñ 24-nde, Ukrayina Silâlı quvetleriniñ Ava küçleri Rusiye ordusı Ukrayina regionlarına darbe dronlarınen ücüm ete, dep haber etti. Esas Ukrayinanıñ 13 vilâyetinde ava telükesi devam etti.
Rusiye arbiyleri Ukrayina regionlarına çeşit silâlarnen muntazam surette ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
