Rusiye ordusı gece Ukrayinağa 614 ava ücüm vastasınen ücüm etti, dep haber ete Telegramda Ukrayina Silâlı quvetleriniñ Ava küçleri.
Ukrayina Silâlı quvetleri bildirgenine köre, Rusiye Ukrayinağa ücüm etti:
574 Shahed uçucısızı ve taqlit uçucısızınen;
Rusiyeniñ Lipetsk ve Voronej vilâyetlerinden dört "Kinjal" X-47M2 aerobalistik raketasınen;
Rusiyeniñ Voronej vilâyetinden eki İskander-M/KN-23 ballistik raketasınen;
Rusiyeniñ Saratov vilâyetinden 19 X-101 qanatlı raketasınen;
Qara deñizden 14 qanatlı Kalibr raketasınen;
Qırımda bir dane belli olmağan çeşitli raketanen.
İlk malümatqa köre, saat 09:00-ğa qadar ava mudafaası 546 Rusiye uçucısızını, bir «Kinjal», 18 X-101 qanatlı raketası, 12 «Kalibr» qanatlı raketasını zararsız alğa ketirdi.
Arbiyler 11 yerde raketa ve darbe uçucısızlarınıñ ücümlerini qayd etti, 3 yerde parçalar tüşti.
Avgustnıñ 21-nde gece Rusiye ordusı Ukrayinağa raketa ve uçucısızlarnen büyük darbe endirdi. Rusiye ordusı Lvivge uçucısız ve qanatlı raketalarnen ücüm etti. Bir qadın elâk oldı ve üç kişi yaralandı. Ücüm neticesinde onlarnen mesken ev zarar kördi.
Rusiye quvetleri Mukaçevodaki müessiselerden birine darbe endirdi, 12 kişi yaralandı.
Yerli akimiyetniñ malümatına köre, Zaporijjâda Rusiye darbeleri neticesinde bir qaç sanayı infrastruktura obyektinde zararlar bar. Şimdilik yaralanğanlar yoq.
Rusiye arbiyleri çeşit silâlardan Ukrayina regionlarına muntazam sürette ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturasına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
