Rusiye orduları aprelniñ 12-ne keçken gecesi Ukrayinağa işğal etilgen Qırımnıñ Çauda burnundan Shahed-131/136 tipindeki 17 dron ve işğal etilgen Donbas toprağınıñ ava boşluğından X-59 ava raketaları ile ücüm etti, dep haber ete Ukrayina Arbiy Silâlı quvetleriniñ Ava quvetleri.
"Ava quvetleriniñ aviatsiyası ve Ukrayina mudafaa quvetleriniñ mobil ateş gruppaları tarafından avağa qarşı uruş neticesinde Mıkolayiv, Odesa, Herson, Dnipropetrovsk, Vinnitsâ ve Hmelnitsk vilâyetlerinde "Şahed" tipindeki 16 ücüm uçaqları tüşürildi", - dep aytıla haberde.
Rusiye arbiyleri Ukrayina regionlarına çeşit silâlardan muntazam surette ücüm ete. Delillerge baqmadan, Moskva, büyük istilâ başlağanından berli, Ukrayina vatandaşları ve infrastrukturağa nisbeten maqsatlı ücüm olğanını red ete.
Rusiye soñki aftaları Ukrayina energetik infrastrukturalarına ücümlerni quvetleştirdi. Aprelniñ 11-nde saba Rusiye orduları Ukrayinağa dron ve raketalardan ücüm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
