İyülniñ 25-ne keçken gece Rusiye ordusı Kıyivge pilotsız uçaqlar ile ücüm etken, Ukrayina Ava mudafaası quvetelri episini urıp tüşürgen. Bunı Kıyiv şeeriniñ arbiy memuriyetiniñ yolbaşçısı Sergiy Popko haber etti.
"Telüke signalı üç saat devam etti. İlk malümatqa köre, duşman İranda işlep çıqarılğan Shahed dronlarını qullandı. Soñki ay devamında bu artıq paytahqa altıncı ücüm. Ava mudafaası quvetleri episini urıp tüşürdi", - dep haber etile bildirmede.
Onıñ sözlerine köre, paytahtqa qarşı ücüm neticesinde dağıluvlar ve zarar körgenler yoq.
Rusiye ukrayin şeerlerini muntazam tarzda ateşke tuta, hususan Kıyivni, aynı zamanda dron ve raketalar qullana.
İyülniñ 24-nde saba eki uçucısız cihaz Moskvağa ücüm etti. Ciddiy zarar yoq, kimse yaralanmadı, dep bildirdi Moskva akimiyeti. Rusiye Mudafaa nazirligi Ukrayinanı qabaatladı. Ukrayina arbiyleri Moskvağa qarşı ücüm malümatını izaatlamadı.
Bundan ğayrı iyülniñ 24-nde saba Aksönov Qırımda 11 uçucısız tesirsiz alğa ketirildi, dep bildirdi. Canköy rayonında silâ anbarından ğayrı, uçucısız parçaları İslâm Terek rayonındaki mesken evge zarar ketirgen. Ukrayina Mudafaa nazirliginiñ Baş istihbarat idaresi uçucısızlarnıñ Rusiye işğal etken Qırımnıñ Canköy ve İslâm Terek rayonlarına qarşı ücümini izaatladı. Ukrayina Mudafaa nazirligi Baş istihbarat idaresiniñ vekili Andriy Yusov bildirgenine köre, Qırımnıñ Rusiye arbiy obyektlerine qarşı ücümler Kreml rejiminiñ "olarnı bile qorup olamağanını" köstere.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
