Sentâbrniñ 3-nde gece Rusiye akimiyeti Keriç köpründe areketni bir buçuq saatqa qapattı, aynı vaqıtta Rusiye monitoring saifeleri uçucısız ve raketalarnıñ darbe telükesi aqqında bildirmedi, bazı Qırım Telegram kanalları ise patlavlar aqqında yazdı.
Rusiye akimiyeti kontrolindeki monitoring kanalınıñ haberine köre, köpürde saat 0:31-den 1:57-ge qadar areket qapatılğan edi.
Aynı vaqıtta bir qaç Rusiye monitoring saifesi Tarhankut, Aqyar, Donuzlav, soñra da Qırım yarımadasında dron ve «Neptun» raketalarınıñ telükesi aqqında yazdı.
«Krımskiy veter» Telegram kanalı gece Aluşta civarında eşitilgen beş patlav ve Rusiye Federatsiyası 3-ünci radiotehnik polkunıñ radiolokatsion tüyümi yerleşken Lazurnoye yanındaki dağlarda yanğın aqqında bildirdi. Bu malümat Qırım.Aqiqat jurnalistleri azırlağan Qırımdaki Rusiye arbiy obyektleriniñ interaktiv haritasında bar.
Rusiye akimiyeti vaziyetni resmiy şekilde izaatlamadı. Bundan evel Rusiye Mudafaa nazirligi Qırımda tüşürilgen yedi dron ve Qara deñizde 10 uçucısız aqqında bildirdi. Sentâbrniñ 3-nde saba anda Qırımda tüşürilgen daa 8 dron, Qara deñizde tüşürilgen daa 15 dron aqqında haber etildi. Ukrayina arbiyleri bu malümatnı şimdilik aydınlatmadı.
2022 senesinden başlap yarımadağa aman-aman er kün arbiy uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.
