Dekabrniñ 28-nde gece Qırımğa eki uçucısız uçaq ile ücüm etildi, dep bildire Rusiye Mudafaa nazirligi.
Müessiseniñ matbuat hızmeti yazğanına köre, eki uçaq tipli dron ava mudafaası sisteması tarafından urulğan. Rusiye Mudafaa nazirligi ücümde Ukrayinanı qabaatlay. Ukrayina arbiyleri bu haberni şimdilik izaatlamadı.
Bir kün evelsi Qırım.Aqiqat mühbiri Aqyarda eñ azından dört patlav aqqında haber etken edi. Aqyarnıñ Rusiye yolbaşçısı Mihail Razvojayev RF ava mudafaası tarafından tüşürilgenini bildirgen edi.
Daa evel Ukrayina Ava quvetleri taktika aviatsiyası Rusiyeniñ Qara deñiz flotunıñ Novoçerkassk adlı büyük desant gemisine qanatlı raketalarnen ücüm etti, dep bildirgen edi.
Ukrayina Ava quvetleriniñ spikeri Yuriy İgnatnıñ aytqanına köre, ukrayin aviatsiyası tarafından qullanılğan qanatlı raketalar ile ücüm etilgen Novoçerkassk yanıp bitti ve liman infraterkibi zarar kördi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
