Gece Qırımda ve Aqyarda dronlarnıñ uçuşı, Rusiye mobil ateş taqımlarınıñ ve ava mudafaasınıñ işi ve patlavlar eşitildi, dep bildire yerli pablikler.
Hususan, "Krımskiy veter" telegram kanalı yerli sakinlerge atıf eterek, saat 22:00 yaqın Aqyar civarındaki Orlovkada patlav ve atış sesleri eşitildi, 00:50 Qurman rayonında da üç patlav eşitildi, dep bildirdi. Saat 1:00-de şaatlar Aqyarnıñ Fiolent burnu üzerinde uçaqlarnı kördi, mobil ateş taqımları olarnı urmağa tırıştı.
Rusiye Mudafaa nazirligi, Rusiye Federatsiyasınıñ bir sıra regionı, Qırım ve Qara ve Azaq deñizleri üzerinde 267 dron urulıp tüşürildi, dep bildirdi.
Qırım.Aqiqat cenk şaraitinde bu malümatnı mustaqil sürette teşkerip, tasdıqlayalamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.