Qırımda Orta küzniñ 5-nde aqşam pilotsız havf ilân etildi, Canköy ve Curçı rayonlarında patlavlar eşitildi, dep yaza yerli telegram kanalları. Orta küzniñ 6-nda saba, ağlarda bozuvlar ve magistral ağlarnıñ tamiri sebebinden bir qaç meskün yerlerde elektrik energiyasınıñ kesilüvi aqqında haberler peyda oldı.
Qırımdaki Rusiye Fevqulâde vaziyetler nazirliginiñ idaresi bildirgenine köre, saat 23:25 Qırım yarımadasınıñ şimalinde pilotsız havf ilân etildi, RF ava mudafaasınıñ işi de eşitildi. Daa evel "Krımskiy veter" telegram kanalı Canköy ve Curçı rayonlarında patlavlar aqqında haber etken edi.
Orta küzniñ 6-nda saba Rusiye kütleviy haber vastaları "Krımenergo" şirketine atıf eterek, Canköy ve Canköy rayonında saat 17:00-ge qadar magistral energiya ağlarınıñ tamiri sebebinden yarıq olmaycağını bildirdiler. Bundan ğayrı, Aluştada qaza neticesinde söndürüvler, em de Bağçasaray rayonında elektrik teminlevi ile bağlı problemler aqqında haber etildi.
Rusiye Mudafaa nazirligi Qırım ve qomşu Rusiyeniñ bir sıra regionlarında tüşürilgen 868 dron aqqında esabat berdi Uçaqlarnıñ qaçı urulıp tüşürilmedi, haber etilmedi, ücümlerniñ aqibetleri aqqında müessisede aytılmadı. Ukrayina arbiyleri ücümni izaatlamadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.