Kiçik aynıñ 17-ne keçer gecesi Qırımnıñ farqlı rayonlarında uçucısızlar ücümleri oldı, dep bildire yerli telegram kanalları. Rusiye Mudafaa nazirligi, Qırım, Qara ve Azaq deñizleri üzerinde kiçik aynıñ 16-nda saat 20:00 ve kiçik aynıñ 17-nde saat 9:00 qadar 183 dron urulıp tüşürilgenini bildirdi.
Şu cümleden, "Krımskiy veter" telegram-kanalı yerli sakinlerge atıf etip, RF Ava mudafaasınıñ işi ve Kefe, Keriç, Canköy, İslâm Terek ve Aqmescit rayonlarında eşitilgen patlavlar aqqında yaza. Bundan ğayrı, gece devamında "Belbek", "Kirovsk" ve "Kaça" uçaq alanlarınıñ civarında patlavlar aqqında haber etilgen edi. Ücümniñ aqibetleri aqqında bir şey aytılmay.
Rusiye Mudafaa nazirligi bildirgenine köre, tünevin saat 20:00 ve bugün saat 9:00 arasında Rusiye ava mudafaası Qırım üzerinde 48 dron, Qara deñizde 91 dron ve Azaq deñizinde 44 dronnı urıp tüşürdi.
2022 senesinden başlap, Qırım yarımadasınıñ territoriyasına aman-aman er kün pilotsız uçaq ve raketalar ücüm ete, bu malümatnı teşkermege imkân olsa da, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.