Rusiye müessisesiniñ bildirgenine köre, yarımada üzerinde 11 uçucısız uçaq ya toqtatıldı, ya da tüşürildi. Aqyarnıñ Rusiye yolbaşçısı Mihail Razvojayev pilotsız uçaqlardan biri Belbek akvatoriyasında tüşürilgenini bildirdi. Muarririyetniñ Rusiye akimiyetiniñ beyanatlarına dair delilleri yoq.
Yanvarniñ 27-nde saba Aqyarda raketalar ateşke berilgenine oşağan yüksek sesler eşitildi. Soñra patlav eşitildi, pencerelerniñ camları titredi. Qırım.Aqiqat mühbiri, bu, ava mudafaası sisteması çalışqanını tahmin etti.
Aynı vaqıtta Aqyarnıñ rusiyeli başı Mihail Razvjayev şeerde olğan patlav RF arbiyleriniñ talimleri ile bağlı olğanını iddia ete.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
