Rusiye Mudafaa nazirliginiñ bildirgenine köre, Qırım üzerinde 33 dron yoq etildi ve zapt etildi. Qara deñizde Ukrayina Silâlı quvetleriniñ ekipajsız on katerini yoq ettiler.
Aqyarnıñ Rusiye yolbaşçısı Mihail Razvojayev şeerde "küçlü sesler" eşitilgenini bildirdi, bunı ise "arbiyler suv üstündeki uçaqnıñ ücüm teşebbüsini red etkeni" ile añlattı. İlhaq etilgen şeerde ava mudafaasınıñ işi ile video "Krımskiy veter" telegram kanalında tarqalğan.
Rusiye akimiyetiniñ beyanatları mustaqil şekilde tasdıqlanmalı. Qırımnıñ telegram kanalları Mirnoy ve Novozernoy rayonlarında, em de Aquardaki Kazaçya körfezi yanında patlavlar aqqında haber ete ediler.
İyülniñ 15-nde Qırımğa uçucısız uçaqlar ücüm etti. Qırım.Aqiqat mühbiri bildirgeni kibi, Aqyarda ava telükesi signalını saba saat 6-da qoydılar. Gece sakinler patlav ve ateş açuv seslerini eşitkenler.
Rusiye Mudafaa nazirliginiñ bildirgenine köre, yarımada üzerinde altı dron urıp tüşürildi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
