İyünniñ 30-ndan iyülniñ 1-ne keçer gecesi Rusiye akimiyeti Keriç köpründe ve Aqyar körfezi reydinde areketni qapatqan edi. Yerli Telegram kanallarında aqşam ve gece Qırımğa raketa ve uçucısızlarnıñ ücümi aqqında haberler peyda oldı, ava telükesi de ilân etildi.
«Krımskiy veter» Telegram kanalı haber etkenine köre, Qırımda C-300/C-400 zenit-raketa kompleksleri ve Yedi Quyu rayonınıñ Han Toquz (Kurortnoye) köyü yaqınlarında radiolokatsion stantsiya ücümge oğrağandır – NASA uyduları bu rayonda yanğınnı qayd etti. Muarririyetniñ elinde olğan resimde Rusiye arbiy tehnikası körüne. Qırım.Aqiqat bu malümatnı başqa menbalardan şimdilik tasdıqlap olamay.
Rusiye Mudafaa nazirligi Qırımğa ücümni tasdıqlap, yarımadada 177 ve Azaq deñizinde 11 uçucısıznıñ yoq etilüvi aqqında bildirdi. Darbe ya da zararlar aqqında haber etilmey.
Ukrayina akimiyeti bu ücümni izaatlamadı.
2022 senesinden başlap yarımadağa aman-aman er kün dronlar ve raketalar ücüm ete; ekseriy allarda Rusiyeniñ Mudafaa Nazirligi ya da Rusiye akimiyeti bu malümatnı tasdıqlamaq mümkün olsa da, arbiy nişanlarğa darbe endirilgenini tasdıqlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
