Oktâbrniñ 6-sına keçken gece Aqyarda patlav sesleri eşitilgen. Bunı şeerniñ rusiye akimiyeti ve yerli telegram kanalları haber ete.
"Severnıy mol tarafından şiddetli sesler kele, bu Qara deñiz flotunıñ işi. İlk malümatqa köre, olar eki ekipajsız deñiz kateriniñ ücümine qarşılıq köstere", - dep yazdı Mihail Razvojayev.
"Krımskiy veter" telegram kanalı abunecilerine atıf etip, saba saat beşlerde Aqyarnıñ Gagarino rayonında atış sesleri eşitilgeni aqqında haber ete.
Al-azırda bu malümatnıñ doğru olıp olmağanını mustaqil menbalardan teşkermek imkânsızdır.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
