Aqyarda oktâbrniñ 24-nde saba saat dörtlerde atış ve reaktiv bomba atıcığa oşağan küçlü sesler eşitildi, dep haber ete Qırım.Aqiqat mühbirleri.
Seslerni Aqyarnıñ tış reydi tarafından eşitkenler. Yarım saat devamında atış ve patlavlar biri-biri artından eşitildi.
Aqyarnıñ Rusiye yolbaşçısı Mihail Razvojayev «Qara deñiz flotu suvaltı diversion quvetler ve duşmannıñ vastaları yapqan ücümni keri qaytara», dep bildirji. Tafsilâtlar aydınlatılmadı, bu malümatnı mustaqil menbalarda teşkermek imkânsız ola.
Saba saat 7:50-de eki atışnıñ sesleri eşitildi, Razvojayev olarnı «bomba atuv talimleri» dep adlandırğan edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
