Aqmescitte martnıñ 19-nda kimligi belli olmağan insanlar gaz borusını patlatmağa tırışqanlar, dep bildire Rusiye ve Qırım kütleviy haber vastaları, Telegram kanalları.
Mash Kremlge qoltutqan neşiriniñ malümatına köre, «tünevin aqşam Balaklavskaya soqağındaki garajlarnıñ arqasında aqtı».
«Boru biraz zarar kördi, 70 santimetrlik bir çuqur qaldı. Kimse yaralanmadı, yaqın turğan bir tirkeme zararlandı. İlk malümatqa köre, boru yanında 200 gramm trotil küçünde bir patlayıcı qoyuldı», – dep aytıla kanalnıñ haberinde.
Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov tünevin 21:30-da Aqmescitniñ Pnevmatika rayonında yaşağanlar küçlü bir «patlav» eşitti, dep bildirdi. Onıñ malümatına köre, Balaklavskaya soqağında kimligi belli olmağan insanlar gaz borusını patlatmağa tırışqanlar.
Şübheliler tutulğanına dair bir malümat yoq. Rusiye uquq qoruyıcıları resmiy bir izaat daa bermedi.
Fevralniñ 23-nde aqşam Qırımda tren yoluna zarar ketirildi. Soñra Rusiye uquq qoruyıcıları eñ az yedi qırımtatarınıñ evinde tintüv keçirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
