Bir sıra Ğarp memleketi Qırımnıñ Rusiye tarafından işğaliniñ yıldönümi munasebeti ile bildirüv yaptı.
"Qırımnıñ qanunsız işğalinden doquz yıl soñra Büyük Britaniya Rusiyeniñ tecavuzına qarşı küreşüvni devam ettirgen Ukrayinanıñ tarafında olmağa devam ete. Qırımdaki Ukrayina vatandaşları zulumğa oğratıla: serbestlik yoq, adamlar yaqalanalar, balalar "yañıdan terbiyelev" lagerlerine celp etile", - dep bildirdiler Büyük Britaniya elçiliginde.
Finlândiya elçiliginde, Rusiye halqara uquqnı bozğanını ve bugün de bunı yapmağa devam etkenini qayd ettiler.
"Finlândiya Rusiyeniñ kerçekleştirgen qanunsız işğalni tanımay. Ukrayina topraq bütünligini ve onıñ ğayrıdan tiklenilmesi içün ğayretini destekleymiz. Qırım Ukrayinadır", - dep qayd ettiler elçilikte.
İsveçiya Tış işler nazirligi öz bildirüvinde "Qırım Ukrayinadır. Donetsk Ukrayinadır. Herson Ukrayinadır. Lugansk Ukrayinadır. Zaporijjâ Ukrayinadır" yazısınen resim yayınladı.
"İsveçiya Rusiye tarafından Ukrayina qısmınıñ qanunsız işğalini tanımay. Biz Ukrayinanı desteklemege devam etecekmiz", - dep qayd ettiler Stokgolmda.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
