Gamburgda mayısnıñ 10-nda Halqara deñiz uquqı mahkemesiniñ üç ukrain arbiy gemisi ve 24 deñizciniñ zapt etilüvi boyunca Rusiyege qarşı vaqtınca tedbir alınuvına dair dava baqılmaqta. Bu aqta Ukraina Tış işler nazirliginiñ matbuat hızmeti bildire.
Diñlevlerniñ online yayını mahkemeniñ saytında bar.
Kyivni Ukraina eyyetiniñ reberi, Ukraina Tış işler naziriniñ Avropa integratsiyası meseleleri muavini Olena Zerkal temsil ete.
Tedbir mahkemeniñ esas zalında açıq sürette keçirile. Diñlevler üç saat devam etecek.
Ukraina, Halqara deñiz uquqı mahkemesine muracaat etip, Qırım yalısında zapt etilgen ukrainalı deñizci ve gemilerni azat ettirmek içün Rusiyege qarşı vaqtınca tedbir almağa rica etti. Rusiye bu diñlevlerde iştirak etmekten vazgeçti.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
