Qırımda Rusiye uquq qoruyıcıları Ukrayın medeniyet merkeziniñ faali Galina Balabannıñ evinde tintüv keçirdi, dep bildirdi UMM faali Alena Popova.
Onıñ malümatına köre, tintüv Balabannıñ 2018 senesi «VKontakte» içtimaiy ağında yazğanları içün «ekstremist teşkilâtınıñ timsallerini açıq köstergenine» dair memuriy dava çerçivesinde keçirildi. Tintüvden soñ onı Rusiye kontrolindeki Aqmescitniñ Kiyev rayon mahkemesine alıp ketkenler, anda memuriy protokolı baqıldı.
Alena Popova bildirgenine köre, Balaban eki biñ ruble para cezasını aldı ve cep telefonı alındı. Oña qarşı memuriy dava tafsilâtları belli degil.
Qırımdaki Ukrayın medeniyet merkezi siyasiy bir teşkilât degil. Onı faaller 2015 senesi yarımadada ukrayın medeniyetini saqlamaq ve populârlaştırmaq maqsadınen teşkil etken edi. Merkez iştirakçilerine tazyıq yapılmaqta: olar telükesizlik organları tarafından sorğulav ve «subetlerge» çağırıla, ekstremizmge yol berememezlik hususında tenbilene. Qırımdaki Ukrayın medeniyet merkeziniñ faallerinden biri olğan Leonid Kuzmin telükesizlik hadimleri tarafından yapılğan basqı ve qorquzuvlardan soñ 2017 senesi yarımadanı terk etmege mecbur qalğan edi.
2018 senesi aprel ayında Ukrayın medeniyet merkeziniñ faalleri Alena Popova ve Olga Pavlenko Aqmescitniñ Rusiye prokurorınıñ üyken yardımcısı tarafından «subetke» çağırılğan ediler. Prokuratura hadimini Merkezniñ işi ve «Krımskıy teren» gazetası meraqlandırğan edi. Faaller özüne ve yaqınlarına qarşı şaatlıq etmemek aqqını qullandı.
2018 senesi sentâbr ayında medeniyet merkeziniñ faali Olga Pavlenko Qırımdan ketti. Bundan bir qaç kün ögüne Rusiye FSBsi evini tintti. Şimdi Alena Popova Avropa Birliginde yaşay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
