Halqara mahkemede «Ukraina Rusiyege qarşı» davası boyunca Rusiye eyyetiniñ erkânında Qırımnıñ Rusiye tasil, ilim ve gençlik naziriniñ muavini Ayder Ablâtipov bar. Bu aqta Qırımtatar Milliy Meclisiniñ reisi Refat Çubarov Facebook saifesinde bildirdi.
«Rusiye istilâcıları 40-tan ziyade insandan ibaret eyyet ile keldi, olarnıñ arasında printsipleri olmağanınen belli olğan «Qırımnıñ tasil naziriniñ muavini» Ayder Ablâtipov da bar», – dep bildirdi Çubarov.
Onıñ aytqanına köre, Felemenk Ablâtipovğa bir kerelik viza berdi, «çünki taraflardan biri onı oturışuvğa mahkeme esnasınıñ iştirakçisi dep kirsetti».
Çubarovnıñ qayd etkenine köre, «Rusiye tarafı bunı Qırımnıñ halqara tecritiniñ bozuluvı» dep tanıtmağa tırışacaq, amma «mahkeme oturışuvı yekünlengen soñ Ablâtipov Felemenkten acele ketmeli».
İyünniñ 3-nden 7-ne qadar Gaagada BM Halqara mahkemesinde Terrorizmni maliye etüv ile küreş ve bütün ırqiy ayırım şekillerini yasaqlavğa dair «Ukraina Rusiyege qarşı» davasınıñ ağzaviy diñlevleri olacaq. Diñlevler devamında Rusiye bu organ «Ukraina Rusiyege qarşı» mahkeme davasını baqamaz, dep israr etecek ola.
Ukraina Tış işler naziriniñ muavini Olena Zerkal Ukraina eyyeti «Rusiye propagandasınıñ daa bir portsiyasına maneviy şekilde azır», dep bildirdi. Qırımtatar Milliy Meclisiniñ reisi Refat Çubarov mahkeme diñlevlerine Gaagağa keldi.
2017 senesi Ukraina BM Halqara mahkemesinde Rusiyege qarşı dava açtırıp, onı Ukrainada terrorizmnm maliye etip qoltutqanı içün, em de Ukrainağa qarşı istilâ çerçivesinde ayırım yapqanı içün mesülietke çekilmesini talap etken edi. Vaziyetni köz ögüne alğan mahkeme 2017 senesi aprelniñ 19-nda Ukrainanıñ talabınen Rusiyege qarşı vaqtınca tedbir almağa qarar qabul etti.
Vesiqada Rusiyeden Qırımda Qırımtatar Milliy Meclisiniñ yasağını lâğu etmesi ve yarımadada ukrain ve qırımtatar tillerinde tasil aluvnı temin etmesi talap etile.
