Ukrainanıñ Amerika Birleşken Devletleri elçisi Volodımır Yelçenko Rusiyeniñ mayısnıñ 21-nde teşkil etken BM Telükesizlik şurasınıñ Qırım konferentsiyasına cevap berdi.
«Gaagada körüşirmiz, balalar», – dep izaatladı Yelçenko BM Rusiye vekili Vasiliy Nebenziniñ beyanatlarını. O, Moskva ve Kyiv Qırım meselesinde dialog qurmamalı, çünki yarımada sakinleri «istegenini çoqtan ayttı», dep bildirdi.
Rusiye teşkil etken konferentsiyada Rusiye kontrolindeki Qırım ve Aqyar musulmanları diniy idaresiniñ reis muavini Esadullah Bairov, Rusiye tarafdarı «Qırımnıñ ukrain cemiyeti» cemaat teşkilâtınıñ reisi Anastasiya Gridçina, «Millet» Rusiye devlet kanalınıñ sabıq reberi, Kreml kontrolindeki Bağçasaray şeer şurasınıñ deputatı Ervin Musayev ve «Krım 24» Rusiye telekanalınıñ alıp barıcısı Aleksandr Makar çıqışta bulundılar.
Konferentsiya vaqtında Frenkistan, Belçika ve Avropa Birliginiñ elçileri Moskvanıñ yapqanlarını takbih etip, Ukraina topraq bütünligine qol tutqanını bildirdi. Ukrainanıñ BM missiyası tedbirni boykot etti.
Soñki sefer Qırım meselesi BM Telükesizlik şurasında bu sene mart ayında köterilgen edi. Anda insan aqlarınıñ bozuluvı ve Qırımnı işğalden qurtaruv planlarınen bağlı toplaşuv oldı. Tedbirni Belçika, Estoniya, Frenkistan, Almaniya, Büyük Britaniya ve ABD BM daimiy vekilleri ve Ukrainanıñ BM temsilciligi yardımınen teşkil etken ediler.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
