BM Halqara mahkemesiniñ qadıları Ukrainanıñ Rusiyege qarşı açtırğan davanı muzakere etmege başlay. Davada Qara, Azaq deñizlerinde ve Keriç boğazında Kyiv aqları Rusiye tarafından bozulğanı aqqında aytıla, dep bildirdi cuma künü «İnterfaksqa» bu mahkemeni temsil etken uquq muşaviri Huan İgnasio Massun.
«Bundan soñ (diñlevler bitken soñ – QA) Akemlik mahkemesi muzakerege (dava temeliniñ muşaveresi – QA) başlay. Akemlik qararını qabul etüv müddetleri belgilenmedi», – dep qayd etti uquq muşaviri.
Uquq muşaviriniñ bildirgenine köre, dava baqılğan soñ ketirilgen zararnıñ tazminatı aqqında qarar alına bile. Bu qarar BM deñiz uquqı şartnamesiniñ 7-inci ilâvesine köre qabul etile bile.
Şartnameniñ 7-inci ilâvesindeki 10-uncı maddesine binaen, «akemlik qararı dava sebebinen sıñırlana ve esaslanğan sebepleri aytıla». 11-inci maddege köre, «taraflar şikâyet aqqında evelden añlaşmağan olsa, qarar soñki ola ve şikâyet etilmeycek».
Ukraina Rusiyeni Qara deñiz, Azaq deñizi ve Keriç boğazında ukrain territorial suvlarında Deñiz uquqı şartnamesini bozğanında qabaatlap, 2016 senesi sentâbr ayında mahkemege dava açtırğan edi.
Akemlik mahkemesiniñ daimiy palatası akemlik ve dünyada memleketler arasında davalarnı al etken eski teşkilât ola.
Kyiv akemlik mahkemesinden «Rusiyeni qanunsız areketlerni toqtatmasına mecbur etip, onıñ deñiz aqqını qorumasını rica ete».
Rusiyeniñ fikirince, mahkeme Ukraina davasını baqamaz, çünki mahkeme Qırımnıñ qara toprağında angi devletniñ suveren olğanını bilmey. Rusiye tarafı, mahkeme Azaq deñizinde ve Keriç boğazında faaliyet talaplarını baqamaz, dep tüşüne.
