«Yedi gruppası» (G7) Tış işler nazirleri Ukrainağa onıñ Rusiye istilâsına qarşı tirenüvine qoltutqanını bildirip, Moskvanı gemilerniñ Keriç boğazından keçmesine keder etmemesine ve 2018 senesi zapt etilgen ukrainalı deñiz askerlerini azat etmesine çağırdı, dep bildire Azatlıq Radiosı.
Frenkistanda olğan nazirler körüşüviniñ netice beyannamesinde aytılğanına köre, onıñ iştirakçileri Ukrainanıñ halqara seviyede tanılğan sıñırlarda mustaqilligi ve topraq bütünligine qoltutqanını tekrarladı.
«Rusiyeniñ areketleri halqara uquqnı boza. Rusiyeniñ Keriç boğazında ve yaqın deñizlerde Ukrainağa qarşı yapqan areketlerinden qasevetlenemiz… Rusiyeniñ Ukraina gemileri ve arbiy deñizcilerine küç qullanğanını iç bir şey aqlamaz… Rusiyeni tutulğan deñizci ve gemilerni azat etmesine ve Keriç boğazından qanunğa uyğun bir şekilde keçüvine keder etmemesine çağıramız», – dep aytıla vesiqada.
Bundan ğayrı, nazirler Ukrainadaki islâtlarğa kene qoltutıp, akimiyetni «Ukraina halqı talap etken» islâatlar yolunda ilerilemesine çağırdı.
Qayd etilgen kerekli islâatlar arasında habarcılıq ile küreş, uquqnıñ üstünligini pekitüv ve kütleviy haber vastaları ve vatandaş cemiyetini qorçalav bar.
«Yedi gruppası» Ukraina akimiyetinden saylayıcılarnıñ bütün sınıflarını qaplap alacaq kerçek, serbest ve açıq rey berüvni temin etecegini bekley.
Sanayı tarafından inkişaf etken memleketlerniñ «Yedi gruppası» 2014 senesi Qırım işğali başlağanından berli Ukrainanıñ Rusiye istilâsına qarşı tirenüvinde qoltuta. Rusiye «Sekiz gruppası» birleşmesinden çıqarılğan edi. Birleşme iştirakçileri diger memleketlernen beraber Rusiyege qarşı bir qaç kere sanktsiyalar kirsetken edi.
NATO yanındaki ABD daimiy vekili Key Beyli Hatçison bildirdi ki, yaqın vaqıtta NATO memleketleri «Qara deñizde tedbir alacaq». Onıñ aytqanına köre, bunıñ sayesinde qanunsız işğal etilgen Qırım yalısında Keriç boğazında «Rusiyeniñ agressiv areketleri» sıñırlanacaq.
Aprelniñ 1-nde Ukraina prezidenti Petro Poroşenko Almaniya kantsleri Angela Merkel Rusiye tutqan ukrainalılarnıñ azat etilüvini muzakere etti.
Martnıñ 31-nde Poroşenko Ukraina prezidenti saylavlarınıñ ekinci turından soñ «işğal altındaki ukrain topraqlarınıñ qurtarıluvınıñ müim etapına» başlaycaq, dep bildirdi.
