«Büyük yedi» memleketleriniñ Tış işler nazirleri aprelniñ 5-6-nda olacaq körüşüvde Qırım, Donbas ve Qırım yalısında zapt etilgen ukrainalı deñizci ve Rusiyedeki diger ukrainalı mabüslerni azat etüv meselesini muzakere etecekler.
Bu aqta aprelniñ 5-nde Ukraina Tış işler naziri Pavlo Klimkin bildirdi, dep yaza Ukraina kütleviy haber vastaları.
«Bugün ve yarın (aprelniñ 5-6-nda – QA) G7 nazirler körüşüvi olacaq, Hrıstâ Friland (Kanada Tış işler naziri – QA) iyül ayında olacaq islâatlar meseleleri konferentsiyasınen bağlı fikirlerini paylaşmağa planlaştıra… Elbette, diger meseleler de muzakere etilecek – Qırım ve Donbas, cenk esirleri, siyasiy mabüsler ve ukrain reineleriniñ azat etilüvi», – dep yaza Klimkinniñ aytqanlarını kütleviy haber vastaları.
Ukraina Tış işler naziri Ukraina bunıñ içün yañı uquqiy aletlerni qullanacaq, dep ayttı, olarnı o, bir qaç künden aydınlatacaq.
NATO yanındaki ABD daimiy vekili Key Beyli Hatçison bildirdi ki, yaqın vaqıtta NATO memleketleri «Qara deñizde tedbir alacaq». Onıñ aytqanına köre, bunıñ sayesinde qanunsız işğal etilgen Qırım yalısında Keriç boğazında «Rusiyeniñ agressiv areketleri» sıñırlanacaq.
Aprelniñ 1-nde Ukraina prezidenti Petro Poroşenko Almaniya kantsleri Angela Merkel Rusiye tutqan ukrainalılarnıñ azat etilüvini muzakere etti.
Martnıñ 31-nde Poroşenko Ukraina prezidenti saylavlarınıñ ekinci turından soñ «işğal altındaki ukrain topraqlarınıñ qurtarıluvınıñ müim etapına» başlaycaq, dep bildirdi.
