G7 memleketleri Ukrayinanıñ maliye sistemasını quvetleştirmek içün 19,8 milliard dollar ayırmağa vade ettiler. Bunıñ aqqında G7 memleketleriniñ maliye nazirleriniñ körüşüvinden soñ yayınlanğan kommyunikede yazıla.
"Biz bu cenk devamında ve ondan soñ Ukrayinanıñ menfaatlarını qorçalamağa devam etecekmiz ve kerek olsa daa çoq yapmağa azırmız", - dep bildirdi G7-niñ maliye nazirleri ve memleketlerniñ merkeziy banklarınıñ idarecileri.
Ukrayina, devlet hızmetçileriniñ aylığını bermek ve müdiriyetniñ işi içün ayda tahminen 5 milliard dollar kerek olğanını bildire.
Körüşüv vaqtında Rusiyege qarşı yañı sanktsiyalarnıñ qoyuluv imkânları da muzakere etildi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
