Aqmescitte vokal ocası, ukrain icracısı ve yır müellifi Yuliya Kaçulanıñ çeşit millet talebeleri belli «Güzel Qırım» qırımtatar halq yırını ukrain tilinde icra etip klip çıqardı. Video tünevin, oktâbrniñ 14-nde, derc etildi ve biñ kereden ziyade baqıldı.
«Çekimler Aqmescit civarında oldı, ufuqta Çatırdağ körüne, andan Aluştadan yeller ese. Bu hatıralar yırda ve añda yaşamağa devam ete…», – dep aytıla klip tarifinde.
Yuliya Kaçula Qırım.Aqiqatqa izaat berip, klip çıqaruv tafsilâtları aqqında tarif etti.
«Tercimeden (yırnıñ qırımtatarcadan ukraincege – QA) başlandı. Babam Viktor Kaçula tercime etti. Onı talebelerime kösterdim, Aqmescitte vokal derslerini berem. Talebelerim pek begendi, ya da men olarnı celp ettim, çeşit millet balaları bunı candan qabul etti. Olar o qadar begendi, bunı professional şekilde yapmağa qarar aldım. Kyivdeki çalğıcı dostlarım bu energetikanı pek qayd etken nağme yazdı. O, em duyğulı, em zemaneviy, bütün duyğularnı yetkize. Bu em ağrı, em nostalgiya, amma içimizde yaşağan küç de ola. O bizge hatıra beredir. Bu sebepten biz küçlümiz», – dedi Yuliya Kaçula.
«Güzel Qırım» – belli qırımtatar halq yırı. Onı qırımtatarlar yahşı bile ve türkü qırımtatar kontsertlerinde yanğıray.
Yuliya Kaçula – ukrain yırcısı, yır müellifi, jurnalist, terciman, vokal ocası, Qırımda yaşay. «Ukraince diñle!» leyhasınıñ müellifi.
