Rusiyeniñ Cezalarnı yerine ketirüv federal hızmeti (FSİN) dört aydan soñ makeme qararını yerine ketirmedi ve 13 yılğa üküm etilgen Arsen Abhairovnıñ evine yaqın olğancezahanege avuştırılması aqqında arizasını baqmadı. Buña siyasiy mabüsniñ qadını Azize Abhairov diqqat çekti, dep haber etile "Qırım birdemliginiñ" Facebook saifesinde.
Abhairov Qırımdan sürgün etilgen soñ, makeme onıñ evine yaqınlaştırılması aqqında davasını eki kere baqqan edi. 2022 senesi dekabr ayında Moskvanıñ Zamoskvoretskiy rayon makemesi, FSİN-niñ siyasiy mabüsni qorantasına yaqınlaştırmaq qararını qanunsız dep tanıdı. Makeme müessiseni onıñ muracaatını yañıdan baqmağa mecbur etti, amma FSİN bunı körmemezlikke urdı ve makeme qararını yerine ketirmedi.
2024 senesi yanvar ayından başlap qırımlı evden yedi biñ kilometr uzaqlıqta Ulan-Ude (Bürtiya Cumhuriyeti) 8-nci tüzetüv cezahanesinde buluna. FSİN-niñ başqa bir cevabını alğan soñ, onıñ qadını idarecilikke qarşı daa bir dava açtı. 2024 senesi sentâbr ayında Rusiye kontrolindeki Qırımnıñ Qurman rayon makemesi, FSİN-niñ siyasiy mabüsni avuştırmaqtan red etüvini "motivatsiyasız" dep tanıdı.
Yañı qararda mahkemeci qayd etti ki, 2024 senesi küzde FSİN-niñ siyasiy mabüsni Rusiyeniñ Cenübiy federal okrugına avuştırmaq imkânı bar: işğal etilgen Qırım, Adıgeya, Arhangel, Volgograd ve Rostov vilâyetleriniñ cezahanelerine. Bundan da ğayrı, mahkeme FSİN-ge Abhairovnıñ muracaatını bir ay içinde tekrar baqmaqnı avale etti. 2024 senesi oktâbr ayından berli müessise siyasiy mabüsniñ ricasını baqmadı.
"Aqayım ve men bu qararnıñ yerine ketirilmesi içün FSİN-ge ariza yazdıq. Amma, teessüf ki, o vaqıttan berli ve bugünge qadar köremiz ki, iç bir deñişüv yoq, ve Arsen alâ daa 8-nci tüzetüv cezahanesinde buluna. Aksine, makeme qararınıñ FSİN tarafından körmemezlikke urulğanını ve yerine ketirilmegenini köremiz", — dep tarif etti Azize Abhairova.
Qadın qayd ete ki, FSİN hadimleriniñ lâqaytlığı aqayınıñ aqlarını boza.
"Yol uzaqlığı sebebinden qısqa müddetli ya da uzun müddetli körüşüvlerni qullanıp olamaymız, Arsenniñ maneviy, fizikiy ve duyğu vaziyetini körüp olamaymız. Aile ayatınıñ bozuluvı da körüne, çünki aqayım balalarımıznıñ terbiye etüvinde iştirak etip olamay, balalar ise baba diqqatından ve qayğıruvından marum qaldı", — dep qoştı siyasiy mabüsniñ apayı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.