Keriç Boğazında Rusiye tarafından zapt etilgen Ukraina deñiz askerleriniñ aileleri Amerika Birleşken Devletleriniñ Ukraina elçisi Marie Yovanovitch ile körüşip, Amerika ükümetine Ukraina askerleriniñ azat etilmesi içün küreşmek muracaatınen mektüp berdi. Bu aqta Ukraina Yuqarı Radası reisiniñ birinci muavini İrına Geraşçenko dekabrniñ 5-nde Facebookta bildirdi.
Onıñ aytqanına köre, Ukraina askerleriniñ qorantaları ABDden «Ukraina akimiyeti ile beraber askerlerniñ azat etilmesi içün küreşmesini» rica ete.
«Dünyağa cenk esirlerine ayırğan diqqatları içün minnetdarmız ve deñizcilerniñ, em de Kremlniñ diger esirlerini azat ettirmek içün Rusiyege basqı yapmaq içün sert areketler olacağını bekleymiz», – dep qayd etti Geraşçenko.
Onıñ aytqanına köre, Ukraina askerleriniñ qorantaları bergen malümatqa köre, «cenk esirlerine qorantalarınıñ qoltutuv mektüpleri alâ daa berilmedi ve Ukraina konsulları ve diplomatlarınıñ kirmesine izin berilmedi».
Tünevin Ukraina prezidenti Petro Poroşenko Keriç Boğazında Rusiye tarafından zapt etilgen Ukraina askerleriniñ qorantalarınen körüşti.
Aqmescit ve Keriç mahkemeleri Keriç hastahanesinde bulunğan 3 yaralanğan askernen beraber 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
