Rusiye Federal telükesizlik hızmeti, Moskvanıñ Lefortovo mahkemesinden Qırım yalısında zapt etilgen ukrainalı askerlerniñ tevqif müddetini uzatma oturışuvını qapalı yapmasını istey. Bu aqta Rusiye kütleviy haber vastaları yanvarniñ 14-nde bildire.
Tahqiqat, mahkeme oturışuvınıñ neticelerini tahqiqatçıdan soramayıp aydınlatmamağa rica ete, dep bildire TASS rus haber agentligi ukrainalı askerlerden biriniñ advokatı Sergey Badamşinniñ malümatına esaslanıp.
«FSB, ilk tahqiqat sırına esaslanıp, sıñırlav tedbirini uzatma oturışuvını qapalı şekilde keçirmege talap etti. Neticelerni tahqiqatçınen muzakere etmeyip aydınlatmamağa rica eteler. Bunı adalet açıqlığınıñ esaslarını bozuv dep sayamız», – dep qayd etti rusiyeli advokat.
Qırım.Aqiqat FSBniñ mahkeme muracaatınen bağlı tafsilâtlarnı ögrenmege tırışa.
Yanvarniñ 14-nde Ukraina ombudsmeni Lüdmila Denisova Qırım yalısında FSB tarafından zapt etilgen ukrainalı askerlerniñ qoranta azalarınen beraber Moskvağa keldi. Onıñ bildirgenine köre, o, askerlerniñ tuvğanlarınen beraber yanvarniñ 15-nde Rusiye FSBsiniñ zapt etilgen ukrainalı askerlerniñ sıñırlav tedbirini uzatmaq muracaatı baqılacaq Lefortovo mahkemesiniñ oturışuvına kirmege tırışacaq.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
