Rusiye Federatsiyasınıñ Federal telükesizlik hızmeti Qırımnıñ demiryol naqliyatı obyektlerinde diversiya azırlağan dep dört Qırım sakinini tuttı. Rusiye FSBsi bildirgenine köre, bir Qırım sakini, Rusiye uquq qoruyıcıları aytqanına köre, patlayıcı maddeni saqlağan yerden almağa tırışqanda patlağanından can berdi.
Rusiye mahsus hızmeti bildirgenine köre, tutulğanlar Ukrayına tarafına Rusiye arbiyleriniñ yerleşken ve areket etken yerlerini, ava mudafaa sisteması ve yaqarlıq-energetika kompleksiniñ yerlerini, Keriç köprüniñ qaravulı ve mudafaası aqqında malümat bere edi.
Al-azırda tutulğanlarğa qarşı Rusiye Federatsiyası Ceza kodeksiniñ 30-ıncı maddesiniñ 1-inci qısmı, 205-inci maddesiniñ 1-inci qısmı («Terror ücümine azırlıq») ve 222.1 maddesiniñ 3-ünci maddesine istinaden («Patlayıcı madde ve patlayıcı cihazlarnıñ qanunsız aluv, satuv, berüv, saqlav, taşuv, yollav») cinaiy davalar açıldı.
Tutulğanlarnıñ ad ve soyadları aydınlatılmay. Ukrayına tarafı FSB haberlerini şimdilik izaatlamadı. Rusiye uquq qoruyıcıları aydınlatqan malümatnı diger menbalardan tasdıqlamaq imkânsız ola.
Mayısnıñ 16-nda Rusiye FSBsi Ukrayına istihbaratı tarafından celp etilgen Rusiye vatandaşı azırlağan demiryol teraktına mania yapıldı, dep bildirdi.
Soñki ayda Rusiye uquq qoruyıcıları üçünci kere Qırımnıñ demiryolunda teraktqa yol berilmedi, dep bildire.
Qırımda ve Aqyarda 2014 senesinden başlap eñ azından 16 Ukrayina vatandaşı «casuslıq» ve «diversiyada» qabaatlanıp mahküm etildi. 2015 senesi Rusiye mahkemesi rejissör Oleğ Sentsovnı teraktlarnıñ teşkil etilmesinde qabaatlap, 20 yılğa üküm etti. Rusiye quvetçileri «diversiyanı «Hizb ut-Tahrir» islâm siyasiy teşkilâtınıñ vekillerine de yükley. Rusiyeniñ Ukrayinağa tam miqyaslı istilâsı başlağan soñ yarımadada cenk ile razı olmağanlarnı kütleviy surette taqip eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
