Rusiye FSBsi Qırımda «devlet hainliginde» şübheli sayılğan Yalta sakini tutulıp apiske alındı, dep bildire. Rusiye müessisesi adam Ukraina telükesizlik hızmetine malümat berdi, dep qayd ete.
«Rusiye FSBsi, Rusiye vatandaşınıñ Ukraina telükesizlik hızmetiniñ menfaatlarında yapqan casuslıq faaliyetini toqtattı. Yalta sakini 2017 senesinden 2018 senesine qadar, Ukraina mahsus hızmetiniñ vazifesini yerine ketirip, devlet sırı olğan malümatnı, hususan Federal telükesizlik hızmetiniñ hadimleri aqkında malümatnı toplap yetkize edi», – dep aytıla haberde.
FSB malümatına köre, er adamına qarşı Rusiye Ceza kodeksiniñ 275-inci maddesine istinaden cinaiy dava açıldı – «devlet hainligi». Bu maddege köre 20 yılğa qadar apis cezası berile.
FSB, Yaltadaki mahkeme onı 2 ayğa apiske aldı, dep haber ete.
Apiske alınğan kişiniñ adı ve soyadı aydınlatılmay.
Qırımnıñ Rusiye akimiyetine yaqın media ve menbalarına atıf etken Rusiye kütleviy haber vastaları yazğanına köre, Yalta şeer şurasınıñ sabıq deputatı Yuriy Lomenko apiske alındı.
«Devlet şurası onıñ vekâletlerini vaqtından evel noyabrniñ 8-nde «istegine esaslanıp toqtattı». O, «Yedinaya Rossiya» firqasından bir mandatlı okrugda saylanğan edi», – dep bildire «İnterfaks».
Apiske alınğannıñ ya da imayesiniñ tefsirleri yoq. Ukraina telükesizlik hızmeti bu malümatqa daa cevap bermedi. Qırım.Aqiqat, Ukraina müessisesinden tefsir almağa ve tafsilâtlarnı bilmege tırışa.
Açıq menbalarda olğan malümatqa köre, Lomenko Simeizde (Yalta) doğdı, 2014 senesi Ukraina prezidenti yanındaki Milliy devlet idare akademiyasınıñ Harkiv devlet idaresi regional institutını bitirdi. «Semeynıy otdıh» şirketinde tış alâqalar idaresiniñ müdiri olıp çalıştı. 2013 senesi dekabr ayında nevbetten tış saylavlarda Simeiz yolbaşçısı olaraq saylandı, bundan evel qasaba şurasınıñ kâtibi edi.
FSB, işğal altındaki Qırımda Ukraina mahsus hızmetleri içün çalışqanında şübheli sayılğanlar tutulğanını ilk sefer haber etmey. İyünniñ 24-nde FSB Qırımda Aqmescit sakini tutuldı, dep bildirgen edi. Onı da Ukraina mahsus hızmetleri içün Rusiye arbiy aviatsiyasınıñ uçuşları aqqında malümat toplağanında qabaatladılar. Aprel ayında FSB aynı sebepten Aqyar sakinini tutqan edi.
2019 senesi bildirilgenine köre, Aqyarda Ukraina istihbaratı içün casuslıq yapqanında şübheli sayılğan qadın tutuldı. Ukraina mudafaa nazirligi onen bir alâqaları yoq, dep bildirdi.
