Berilgen malümatqa köre, 38 yaşında qadın Telegramdaki gruppalardan birinde «ruslarnı öldürmege çağırğan eken».
«Qadın tahallüs altında ekstremist izaatlarını qaldırğan edi, lâkin cezasız qalmadı – onı yaqalağanlar», – dep aytıla haberde.
Al-azırda qırımlı qadın bir yerge çıqmamaq şartı altında qala. Qadın 5 yılğa qadar apiske alına bile.
Martnıñ 6-nda haber etilgenine köre, Rusiye uquq qoruyıcıları Aqyar sakinini «ekstremizm çağıruvları» sebebinden tuttı.
Fevralniñ soñunda Qırımda Rusiye kontrolindeki İslâm Terek rayon mahkemesi yerli sakinni internette «millet mensüpligine köre insanlarğa zorbalıq areketlerine çağırğanında» qabaatlap, beş yılğa üküm etti.
Bundan evel, yanvarniñ soñunda Rusiye kontrolindeki Kefe şeer mahkemesi yerli sakinni «ruslarnı öldürmege çağırğanı» içün eki buçuq yılğa üküm etti.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını «areketsizleştirgenleri» içün yaqalana ve memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
