Rusiye uquq qoruyıcıları Qırımda Rusiyede yasaqlanğan «Noman Çelebicihan qırımtatar batalyonında» iştirak etkeninden şübheli sayılğan eki erkekni tuttı, dep bildirdi, dep haber ete Rusiye kütleviy haber vastaları FSB matbuat hızmetine esaslanıp.
FSB vekilleri 1996 ve 1999 seneleri doğma Ukrayına vatandaşlarını tuttı. «2017 senesi erkekler Ukrayınadaki «Noman Çelebicihan qırımtatar göñülli batalyonı» silâlı birleşmesine qoşuldı», – dep aytıla haberde.
Rusiye uquq qoruyıcılarınıñ aytqanına köre, tutulğanlar «batalyon» faaliyetinde faal iştirak etti, insanlarnı ve naqliyatnı keçiş noqtalarında teşkerdi.
FSB, tutulğanlarğa qarşı Rusiye Ceza kodeksiniñ 208 maddesiniñ 2-nci qısmına (federal qanunda olmağan silâlı birleşmede iştirak etüv) istinaden cinaiy dava açtı. Bu maddege köre olarnı 15 yılğa azatlıqtan marum ete bileler. Cinaiy dava mabüsleriniñ ad ve soyadları aytılmay.
Rusiye FSBsi erkekler qayda tutulğanını aytmadı. Soñki yılda Rusiye Federatsiyasınıñ quvetçileri işğal etilgen topraqlarda Ukrayına vatandaşlarını tutıp, Qırımğa çıqara ve «qırımtatar batalyonında» iştirak etkeninde qabaatlağan edi.
Hatırlatamız, işğal etilgen Qırımda «Noman Çelebicihan qırımtatar batalyonında» iştirak etüv manaçığınen taqip etilgen onlarnen insan bar. Bazıları apis cezalarını aldı ve Rusiye apishanelerinde yata.
Rusiye FSBsi «Noman Çelebicihan qırımtatar batalyonını» 2022 senesi «terror teşkilâtları» cedveline kirsetti.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi. «Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
