Qırımda üç kün devamında tuvğanları ve advokatlar martnıñ 4-nde Bağçasaraydaki «Krımtelekom» ofisinde devlet hainligi ve Ukraina telükesizlik hızmeti ile işbirligi şübhesinen tutulğan qırımtatarı Emil Emirovnı tapıp olamaylar. Bu aqta «Gratı» neşiri haber ete. Neşir tutulğannıñ ömür arqadaşı ve qızı – Dilâra ve Fera Emirovlarnen laf etti.
«O, nutuqçı ya da faal degil, amma akimiyet tarafından taqip etilgen insanlarğa daima qoltutqan edi. O, epimiz kibi, qırımtatarlarğa qarşı repressiyalarğa büyük ağrınen baqqan edi. Men, belki, daa duyğulı edim, o, bunı köstermedi. Tutulğan soñ başta bulunğan yerini bilmey edik. Añlaşqan advokatımız FSB reberliginen bağlanmağa tırıştı. Men İç işler nazirligen, prokuratura ve FSBge telefon etecem, dep qarar aldıq, çünki onıñ bulunğan yerini bilmey edim. Mennen İç işler nazirliginden bağlandılar, aqayımnı kerçekten qıdırammı dep soradılar. Bugün sabadan Aqmescitteki İç işler nazirliginiñ operativ vekâletlisi, aqşam ise Bağçasaray velâyetlisi aqayım keldimi dep soradılar. Amma o, alâ daa evde degil», – dep ayttı Dilâra Emirova.
Onıñ bildirgenine köre, o, FSBniñ «sıcaq ağına» bir qaç kere telefon etti.
«Advokat ömür arqadaşımnen körüşip olamay. Men o qadar uzun vaqıt devamında malümat olmasa, aqayım FSB hadimleri tarafından maneviy ve/ya da bedeniy basqığa oğratıla, dep qorqam. Tez tedbir almağa rica etem: onıñ sağlığı ve ayatı içün qasevetlenem. Advokatnı da kirsetmege rica etem», – dep yazdı Emirova beyanatta.
Dilâra Emirova Qırımdaki Rusiye FSBsiniñ yolbaşçısı adına ariza tizip yolladı.
«Ne mahkeme, ne de bir de bir tahqiqat tedbiri alâ daa yoq, bu meni qorquza. Bir şey belli degil», – dep bildirdi Emirova.
Bağçasarayda martnıñ 4-nde Rusiye uquq qoruyıcıları, ömür arqadaşınıñ aytqanına köre, «devlet hainliginde ve Ukraina agentlerinen bağı olğanında» qabaatlanğan qırımtatarı Emil Emirovnıñ evinde tintüv keçirildi. Dilâra Emirovanıñ fikirince, aqayına qarşı dava sahte ola.
Rusiye uquq qoruyıcıları Emil Emirov tutuldı, dep resmiy şekilde bildirmedi.
Martnıñ 5-nde Rusiye FSBsi Qırımda «qırımtatar batalyonına» kirgen Ukraina vatandaşı tutuldı, dep bildirdi. Adı ve soyadı aydınlatılmay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
