Rusiye quvetçileri dekabrniñ 19-nda yaqalanğan Ernest ve Marlen Ahayevni azat etti. Bunı "Qırım birdemligi" cemaat birleşmesi haber ete.
Berilgen malümatqa köre, şimdi ağa-qardaş dostları ve soy-sopları ile beraber evlerine yol alğanlar.
"Faallerniñ bulunğan yeri ve başından neler keçirgenleri aqqında tafsilât soñra olacaq", - dep qad ettiler birleşmede.
Rusiye quvetçileri bugün saba Qırımda yaqalanğan Ahayev qardaşlarınıñ bulunğan yerini bildirmey. İhtimal ki, olar iskencelerge oğratıla. Bunı Qırım.Aqiqatqa uquq qoruyıcı Lilâ Gemeci bildirdi.
Dekabrniñ 19-nda işğal etilgen Qırımnıñ Canköy rayonındaki Avuz Qırq köyünde rusiye quvetçileri üç qırımtatarnıñ evinde tintüv keçirgen. Faallerniñ haber etkenine köre, tintüvnler ağa-qardaş Ernest, Marlen ve Amet Ahayevlerniñ evlerinde olıp keçken.
Cumaaqşamı künü, dekabrniñ 15-nde, Canköy rayonınıñ Avuz Qırq (Medvedevka) köyünde qırımtatarı Mustafa Murahasnıñ evinde tintüv keçirildi – Rusiye uquq qoruyıcıları «yasaqlanğan şeylerni» qıdırdı. Berilgen malümatqa köre, Rusiye İç işler nazirliginiñ hadimleri Avuz Qırqnıñ sakinine silâ ve narkotik qıdırmağa kelgen eken. Rusiye uquq qoruyıcıları ev saibinen bağlı haber kelgen, evinde «yasaqlanğan şeyler» ola bile eken, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
