İşğal altındaki yarımadanıñ İslâm-Terek rayonındaki Jemçujina Krıma köyünde Rusiye uquq qoruyıcıları yerli sakin, tükân satıcısı Dilâver Gafarovnıñ evinde tintüv keçirdi. Bu aqta oktâbrniñ 30-nda Qırım.Aqiqatqa tizesi Elmira tarif etti.
«Saba saat dörtte uquq qoruyıcılar, FSB sürip kirdi. 10 maşina olğandır. Saat 11-ge qadar tintüv keçirgenler. Dilâverniñ ana-babası aytqanına köre, bir şey tapmadılar. Onı Aqmescitke alıp ketkender», – dep tarif etti Elmira.
Onıñ aytqanına köre, resmiy şekilde Dilâver Gafarovğa «bir şey aytılmadı», amma onı «Noman Çelebicihan qırımtatar göñülli batalyonında» iştirak etmesinde şekley bileler.
«Qırım birdemliginiñ» Qırım.Aqiqatqa bildirgenine köre, Gafarovnıñ evinde silâ qıdırğanlar. Olarnıñ malümatına köre, silâ tapılmadı, lâkin Gafarovnıñ bilgisayarı, telefonı, vesiqaları, Ukraina ve Rusiye pasportları alındı. Uquq qoruyıcılar şaat olaraq eki qıznı Kefeden ketirdi.
Rusiye uquq qoruyıcıları vaziyetni izaatlamay.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
