Rusiye FSB-si, Rusiye arbiy hızmetçisine qarşı terroristik akt azırlağan Aqyar sakinini yaqaladı, dep bildire RİA Novosti.
Qayd etilgenine köre, 30 yaşında aqay "yaşayış eviniñ kirişinde arbiy hızmetçige ücüm etmege" planlaştıra edi.
"Bunı yapmaq içün Aqyar sakini gaz borusına patlav cihazını yerleştirdi, bundan soñ FSB hadimleri onı tuttı", — dep aytıla haberde.
FSB, figurant ukrayin mahsus hızmetleriniñ buyurığı ile areket etkenini bildire.
Muarririyet bu malümatnı tasdıqlap olamay. Tutulğannıñ adını ve soyadı, em de onıñ açıq izaatları yoq.
Qırımda ve Aqyarda 2014 senesinden başlap eñ azından 16 Ukrayina vatandaşı "casuslıq" ve "diversiya"da qabaatlanıp mahküm etildi. 2015 senesi Rusiye mahkemesi rejissör Oleg Sentsovnı teraktlarnıñ teşkil etilmesinde qabaatlap, 20 yılğa üküm etti. Rusiye quvetçileri "diversiya"nı "Hizb ut-Tahrir" islâm siyasiy teşkilâtınıñ vekillerine de yükley. Rusiyeniñ Ukrayinağa tam miqyaslı istilâsı başlağan soñ yarımadada cenk ile razı olmağanlar kütleviy surette taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
