Rusiye işğal etken Herson vilâyetiniñ qısmında Rusiye uquq qoruyıcıları 50 yaşında bir adamnı tuttı. Onı «Noman Çelebicihan qırımtatar batalyonınen» alâqası bar olğanında şübheli sayalar, dep yaza RİA Novosti Rusiye devlet agentligi.
Rusiye FSB malümatına köre, 2014 senesinden başlap er adamı batalyonnıñ faal iştirakçisi edi.
«Bundan ğayrı, «Qırımtatar Milliy Meclisi» ekstremist teşkilâtınıñ bir bölügini idare etip, batalyonnıñ qanunsız faaliyetinde iştirak etecek azalarını saylay ve celp ete edi, «yarımada qamaçavı» içün qullanılğan Herson vilâyetinde onıñ bazasını donatmaq içün maddiy yardım köstergen edi», – dep aytıla haberde.
İşğal etilgen Qırımda «Noman Çelebicihan qırımtatar batalyonında» iştirak etüv manaçığınen taqip etilgen onlarnen insan bar. Bazıları apis cezalarını aldı ve Rusiye apishanelerinde yata.
Rusiye FSBsi «Noman Çelebicihan qırımtatar batalyonını» 2022 senesi «terror teşkilâtları» cedveline kirsetti.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi. «Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
