Rusiye federal telükesizlik hızmeti Qırımda arbiy-deñiz gospitalinde terakt azırlağanında qabaatlanğan rusiyeli tutuldı, dep bildirdi. Bu aqta TASS yaza.
«Rusiye Federatsiyasınıñ federal telükesizlik hızmeti Qırım Cumhuriyetinde Rusiye Mudafaa nazirliginiñ sağlıq obyektine qargı diversion-terroristik ücüm yapmağa planlaştırğan Rusiye Federatsiyası vatandaşınıñ qanunsız faaliyetini toqtattı», – dep aytıla haberde.
Rusiye müessisesi qayd etkenine köre, mabüs «Aqmescit şeerinde Rusiye Mudafaa nazirliginiñ Arbiy-deñiz klinik gospitaline qarşı terror ücümini azırlağanı içün tutuldı».
Tintüv vaqtında mıhlar şeklinde unsurlarnen patlayıcı cihaz, özü yapqan yaqıcı cihaz tapıldı.
Tutulğan kişige qarşı Rusiye Ceza kodeksiniñ 222.1 maddesiniñ 1-inci qısmı, 30 maddesiniñ 1-inci qısmı, 205 maddesiniñ 1-inci qısmına istinaden («Terakt yapmağa azırlıq, patlayıcı cihaz ve patlayıcı maddelerni qanunsız saqlav») açıldı.
Mabüsniñ adı ve soyadı aydınlatılmay, onıñ izaatları yoq.
Hatırlatamız, Qırım ve Aqyarda 2014 senesinden berli eñ az 16 Ukrayına vatandaşı «casuslıq» ve «diversiya» qabaatlavlarına köre mahküm etildi, dep bildirgen edi bu yıl yanvar ayında «Qırım aq qorçalayıcı gruppası». Rusiyeniñ Ukrayınağa qarşı tam istilâsı başlağan soñ yarımadada cenkke razı olmağanlar taqip etile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
