Rusiye FSBsi Bazarçıq (Poçtovoye) köyünde demiryolğa ketirilgen zarar sebebinden Bağçasaray rayonınıñ Priyatnoye Svidaniye köyünde Cemilovlar ailesiniñ evini tintti. Bu aqta ana-babasınıñ evine Rusiye uquq qoruyıcıları kelgen Abdulaziz Cemilov «Qırım birdemligine» bildirdi.
Onıñ aytqanına köre, tintüv saba saat 6-larda başladı. Rusiye FSBsi Abdulazizniñ ağası Abdullanıñ Qırımdaki demiryolğa zarar ketirilüvine alâqası olıp olmağanını teşkere eken. Abdulla evde yoq edi. Tintüv vaqtında Rusiye uquq qoruyıcıları advokatlarğa haber etmege imkân bermediler. Cemilovlar tintüv protokolını imzalamadı, dep ayttı Abdulaziz. Rusiye FSBsi bunı resmiy şekilde bildirmedi.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Qırımda Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov adiseni «diversiya» dep adlandırdı. Onıñ malümatına köre, «patlav olmadı, qaynaqnen çalışıp, bir qısmını kesip alğanlar». O, «şübheliler belli, operativ tedbirler keçirile», dep ayttı. Rusiye uquq qoruyıcıları adiseniñ sebepleri aqqında bir malümat bermedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
