Rusiye FSBsi Qırımja «ekstremist faaliyetine açıq çağıruv» davası boyunca erkekni tutqanını» bildirdi, dep haber ete yerli kütleviy haber vastaları.
Berilgen malümatqa köre, o, internet messencerlerinden birinde rusiyelilerge qarşı zorbalıq yapmağa çağırğan eken.
Erkekke qarşı Rusiye Ceza kodeksiniñ 280-inci maddesiniñ 2-nci qısmına istinaden (internetni qullanıp, ekstremist faaliyetine açıq çağıruv) cinaiy dava açıldı. Onı 5 yılğa qadar apiske ala bileler.
Qayd etmeli ki, Rusiye müessisesi adı ve soyadını aydınlatmay. İzaatları da yoq. Muarririyet Rusiye tarafınıñ malümatını teşkerip olamay.
Qırım ve Aqyarda 2014 senesinden başlap eñ az 16 Ukrayına vatandaşı «casuslıq» ve «diversiyalarda» qabaatlanıp mahküm etildi. 2015 senesi terakt azırlanuvını teşkil etüv qabaatı boyunca Ruiye mahkemesi Oleg Sentsovnı 20 yılğa üküm etti. Rusiye uquq qoruyıcıları «Hizb ut-Tahrir» teşkilâtınıñ vekillerini böyle «diversiyalarda» qabaatlağan ediler. Rusiyeniñ Ukrayınağa qarşı büyük istilâsından soñ yarımadada cenkke qarşı çıqqanlar taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
