Aqmescitte Rusiye uquq qoruyıcıları Rusiye ordusınıñ arbiy obyektleri aqqında malümatnı Ukrayinağa bergeninde qabaatlanğan yerli sakinni tuttı, oña 8 yıl apis cezası berile bile.
Uquq qoruyıcılar tutulğan kişi Ukrayina mahsus hızmetleri ile işbirligini tasdıqlağan ve itiraf etken, dep bildire.
«Aqmescit sakini Ukrayina telükesizlik hızmeti tarafından işbirligine celp etildi ve reberiniñ vazifesinen Ukrayina tarafına çetel internet messenceri vastasınen yarımadadaki Rusiye Federatsiyasınıñ Silâlı quvetleriniñ arbiy obyektleri aqqında malümatnı bergen», – dep aytıla haberde.
FSB «çetel devletinen, halqara ya da çetel teşkilâtınen gizli işbirligi» maddesine istinaden cinaiy dava açtı. Ceza 8 yılğa azatlıqtan marum etilüvini belgiley.
Rusiye tarafınıñ malümatını tasdıqlamaq ya da teşkermek imkân yoq.
Qırım aq qorçalayıcı gruppasınıñ malümatına köre, 2025 senesi aprel ayına qadar eñ az 92 Ukrayina vatandaşı işğal etilgen Qırımda «diversiya azırlav» ve «casuslıq» qabaatlavları boyunca apiste yata.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
